Comeza a formación sobre disposicións administrativas impulsada polo Consello Consultivo de Galicia e a EGAP

Comeza a formación sobre disposicións administrativas impulsada polo Consello Consultivo de Galicia e a EGAP

Esta acción de teleformación está incluída na programación de cursos do órgano consultivo e a EGAP para o primeiro semestre do ano

Santiago de Compostela, 1 de xuño de 2026.- Uns 50 empregados públicos das entidades locais e do sector público autonómico galego participan desde hoxe e ata o 22 de xuño no curso “Elaboración de disposicións administrativas de carácter xeral”, que organizan o Consello Consultivo de Galicia e a Escola Galega de Administración Pública (EGAP). Esta actividade formativa desenvólvese ao amparo dun convenio de colaboración entre ambas entidades públicas e con ela pecha a programación do primeiro semestre de 2026.

Os estudantes inscritos neste taller, que ten un enfoque científico e técnico, recibirán formación práctica en materia de redacción de todo tipo de disposicións normativas, como poden ser decretos, ordes e regulamentos, entre outras.  Trátase de reforzar os coñecementos do persoal que traballa nas Administracións públicas galegas, en especial, aquel que participa máis directamente na elaboración de disposicións administrativas.

Para os promotores desta actividade, o coñecemento práctico sobre a elaboración de disposicións administrativas “redunda no mellor exercicio profesional” da función dos empregados públicos. Asemade, lembran que a materia obxecto do curso presenta múltiples dimensións porque, a mesma, inflúe en todos os servizos públicos.

O programa deste curso aborda cuestións como: O Consello Consultivo de Galicia, a súa organización, funcionamento, e réxime xurídico; a titularidade da potestade regulamentaria;  a reserva de lei;  o procedemento de elaboración de regulamentos autonómicos; o procedemento de elaboración de ordenanzas municipais e as directrices de técnica normativa.

OITO ACCIÓNS FORMATIVAS

Co taller que ten lugar este mes remata a oferta formativa organizada pola EGAP e o Consello Consultivo de Galicia para o primeiro semestre de 2026. Así, entre marzo e xuño estivéronse a desenvolver un total de oito cursos, para os que se contaron con 50 prazas en cada un deles.

Entre marzo e abril, o persoal público puido ampliar coñecementos e mellorar as súas habilidades técnico-xurídicas a través de cinco teleformacións: “A función consultiva do Consello Consultivo de Galicia”, “A intervención do Consello Consultivo de Galicia na contratación pública”, “A responsabilidade patrimonial por razóns de carácter urbanístico. Os supostos indemnizatorios” e “A revisión en vía administrativa de títulos habilitantes de natureza urbanística”, así como do “Curso práctico sobre responsabilidade patrimonial das entidades locais”.

En maio, xusto antes do taller de xuño, as actividades foron dúas. A primeira baixo o título “O procedemento de responsabilidade patrimonial: irregularidades, defectos e cuestións prácticas”, celebrouse do 4 ao 28 do mes pasado;  e a segunda, enunciada como “Os recursos administrativos na Lei 39/2015, do 1 de outubro, do procedemento administrativo común das administracións públicas”, comezou o 18 de maio e remata o vindeiro 11 de xuño. Como remate das actividades no primeiro semestre, desde hoxe e ata o 22 de xuño, desenvolverase o curso “Elaboración de disposicións administrativas de carácter xeral”.

O Consello Consultivo de Galicia e a EGAP, froito dun convenio de colaboración en vigor, promoven o desenvolvemento de actividades de carácter formativo, divulgador e investigador en materias da súa competencia. Trátase de contribuír a un mellor coñecemento do órgano consultivo, co obxectivo de un mellor cumprimento das funcións atribuídas en cada caso e en beneficio da cidadanía e da sociedade galega.